Angliya Premyer-ligasining eng yaxshi pleymeykerlaridan biri o‘z jamoasini tark etib, "Tottenxem"ga o‘tishga tayyor.

TBR Football nashri jurnalisti Grem Beylining ma’lum qilishicha, "Kristal Pelas" a’zosi 26 yoshli Eberechi Eze klubni tark etish vaqti keldi deb hisoblamoqda va bu haqda u yaqinda "burgutlar" rahbariyatiga ma’lum qilgan. "Shporlar" vakillari hujumkor yarim himoyachi va vinger pozisiyasida o‘ynashi mumkin bo‘lgan angliyalik futbolchini o‘z safiga qo‘shib olmoqchi, ammo ular "Manchester Siti," "Nyukasl" va "Aston Villa" bilan jiddiy raqobatga duch kelishlari mumkin. Shuningdek, Eze yevrokuboklarda ishtirok etadigan klubga o‘tishni istamoqda. "Arsenal," "Chelsi" va "Liverpul" uning iqtidorini yuqori baholamoqda, ammo ular uchun bu ustuvor maqsad emas.

Bu mavsumda Eberechi Eze "Kristal Pelas" safida barcha musobaqalarda 38 ta o‘yinda 9 ta gol urdi va 11 ta golli uzatmani amalga oshirdi. Transfermarkt portali uning narxini 55 million yevroga baholamoqda.