Англия Премьер-лигасининг энг яхши плеймейкерларидан бири ўз жамоасини тарк этиб, "Тоттенхэм"га ўтишга тайёр.

TBR Football нашри журналисти Грэм Бэйлининг маълум қилишича, "Кристал Пэлас" аъзоси 26 ёшли Эберечи Эзе клубни тарк этиш вақти келди деб ҳисобламоқда ва бу ҳақда у яқинда "бургутлар" раҳбариятига маълум қилган. "Шпорлар" вакиллари ҳужумкор ярим ҳимоячи ва вингер позициясида ўйнаши мумкин бўлган англиялик футболчини ўз сафига қўшиб олмоқчи, аммо улар "Манчестер Сити," "Ньюкасл" ва "Астон Вилла" билан жиддий рақобатга дуч келишлари мумкин. Шунингдек, Эзе еврокубокларда иштирок этадиган клубга ўтишни истамоқда. "Арсенал," "Челси" ва "Ливерпуль" унинг иқтидорини юқори баҳоламоқда, аммо улар учун бу устувор мақсад эмас.

Бу мавсумда Эберечи Эзе "Кристал Пэлас" сафида барча мусобақаларда 38 та ўйинда 9 та гол урди ва 11 та голли узатмани амалга оширди. Transfermarkt портали унинг нархини 55 миллион еврога баҳоламоқда.