Ozarbayjonning Mingachevir shahrida bo‘lib o‘tgan an’anaviy "Prezident cup – 2025" xalqaro regatasida O‘zbekiston eshkak eshuvchilari yana bir bor muvaffaqiyatga erishishdi.
Baydarka va kanoyada eshkak eshish bo‘yicha 500 metr masofaga o‘tkazilgan bahslarda terma jamoamiz vakillari yuqori natijalar qayd etdi. C-1 yo‘nalishida Bahruz Ergashev, K-1 yo‘nalishida esa Danil Kryukov oltin medalni qo‘lga kiritdi. Shu yo‘nalishda ishtirok etgan Maksim Ivliyev esa bronza medaliga sazovor bo‘ldi.
Shuningdek, Ergashev va Kryukov 1000 metr masofadagi bahslarda ham g‘alaba qozonib, musobaqaning eng yorqin ishtirokchilaridan bo‘lishdi.
E’tiborga molik jihat shundaki, Behruz Ergashev 200 metrga o‘tkazilgan bellashuvda ham oltin medalni qo‘lga kiritgan. K-2 yo‘nalishida juftlik bahslarida Maksim Ivliyev hamda Zafar Baxtiyorov tandemi shohsupaning eng yuqori pog‘onasidan joy oldi. Zafar Baxtiyorov K-1 yakkalik bahslarida kumush medalni qo‘lga kiritdi.
Akademik eshkak eshish bo‘yicha 200 metr masofadagi juftliklar bahsida Lazizbek Qo‘chqorov va Sarvar Mamarasulov birinchi o‘rinni egalladi. Yakkalik bahslarida esa Qo‘chqorov kumush medal bilan taqdirlandi.
