Озарбайжоннинг Мингачевир шаҳрида бўлиб ўтган анъанавий "Prezident cup – 2025" халқаро регатасида Ўзбекистон эшкак эшувчилари яна бир бор муваффақиятга эришишди.
Байдарка ва канояда эшкак эшиш бўйича 500 метр масофага ўтказилган баҳсларда терма жамоамиз вакиллари юқори натижалар қайд этди. C-1 йўналишида Баҳруз Эргашев, К-1 йўналишида эса Данил Крюков олтин медални қўлга киритди. Шу йўналишда иштирок этган Максим Ивлиев эса бронза медалига сазовор бўлди.
Шунингдек, Эргашев ва Крюков 1000 метр масофадаги баҳсларда ҳам ғалаба қозониб, мусобақанинг энг ёрқин иштирокчиларидан бўлишди.
Эътиборга молик жиҳат шундаки, Беҳруз Эргашев 200 метрга ўтказилган беллашувда ҳам олтин медални қўлга киритган. К-2 йўналишида жуфтлик баҳсларида Максим Ивлиев ҳамда Зафар Бахтиёров тандеми шоҳсупанинг энг юқори поғонасидан жой олди. Зафар Бахтиёров К-1 яккалик баҳсларида кумуш медални қўлга киритди.
Академик эшкак эшиш бўйича 200 метр масофадаги жуфтликлар баҳсида Лазизбек Қўчқоров ва Сарвар Мамарасулов биринчи ўринни эгаллади. Яккалик баҳсларида эса Қўчқоров кумуш медаль билан тақдирланди.
