Испания терма жамоаси ва «Манчестер Сити» ярим ҳимоячиси Родри Эрнандес Мадриднинг «Реал» клубига ўтишга жуда яқин турибди. Бу ҳақда ижтимоий тармоқларда инсайдер Николо Скира хабар бермоқда.
Манба хабарига кўра, трансфер битими 60 миллион еврони ташкил этади. 30 ёшли хавбек «қироллик клуби» билан 2030 йилгача мўлжалланган узоқ муддатли шартнома шартларини келишиб олди. «Қаймоқранглилар» президенти Флорентино Перес ушбу ўтишни иложи борича тезроқ расмийлаштиришга ҳаракат қилмоқда.
Родри 2019 йилнинг июль ойидан бери «Манчестер Сити» шарафини ҳимоя қилиб келмоқда ва унинг амалдаги шартномаси 2027 йилнинг июнь ойи охирида якунига етади.
Эслатиб ўтамиз, Родри Эрнандес яқиндагина якунланган 2026 йилги Жаҳон чемпионатининг энг яхши футболчиси деб тан олинган эди.
