Mamlakat milliy chempionatining 8-turi «yonayapti» do‘stlar. "Olov yoqishni" o‘zbek futboli vatani – qo‘qonliklar boshlab berishdi. Superligaga bu yil qaytgan jamoa 2025 yilgi mavsum peshqadamlaridan biri – «Bunyodkor»ni Toshkentda "devor ushlatib ketdi". «Xorazm» esa Jizzaxda amaldagi chempion «Nasaf»dan bir ochko tortib oldi.

Bugun esa bosh murabbiyi Ulug‘bek Baqoyevni saqlab qolishga harakat qilayotgan «Buxoro» JARda «Mash’al»ga imkoniyatni boy berib qo‘ydi. Buxoroliklar 10 yildan buyon muborakliklarni Superliga doirasida o‘z maydonlarida yuta olishmayapti.

OKMK o‘zi uchun ko‘ngilli bo‘lgan an’anani bugun yana davom ettirdi. Mirjalol Qosimov shogirdlari bu yilgi chempionatda uchrashuvlarning so‘nggi daqiqalarini «yondirishayapti» va hech kim kutmagan kambeklarni amalga oshirishmoqda. 8-turda «Andijon» Mirjalol Qosimovning mana shunday "achchiq oshidan" totib ko‘rdi. 3:1 hisobida g‘alaba qozonayotgan, buning ustiga ikkinchi taymda bir kishi ko‘p bo‘lib qolgan Xomyakov shogirdlari yutuqni ushlab qola olishmadi. 87-, 90+3- hamda 90+7-daqiqalarda kiritilgan gollar OKMKga navbatdagi shov shuvli g‘alabani taqdim etdi. O‘z navbatida Olmaliq jamoasi «Andijon»ga o‘z maydonida bungacha bironta o‘yinni boy bermagan edi: 13 ta o‘yin, 9 ta g‘alaba, 4 ta durang. Bu borada ham yoqimli an’ana davom etdi.

Va nihoyat Termizning «Surxon» jamoasi 22 yildan keyin mamlakatimizning eng nomdor jamoasi «Paxtakor»ni o‘z maydonida taslim etdi.