Leroy Sane "Bavariya" bilan shartnomasini uzaytirish haqidagi fikrini o‘zgartirgan ko‘rinadi.

Sport1 xabariga ko‘ra, qanot hujumchisi "Bavariya" rahbariyatini hayratda qoldirib, agentini o‘zgartirishga va ishlarni boshqarishni Pini Zaxaviga topshirishga qaror qilgan. Ta’kidlanishicha, bir necha soat oldin sport direktori Maks Eberl shartnomani uzaytirish uchun yetishmayotgan narsa faqat imzo ekanligiga ishonch hosil qilgan.

Shunga qaramay, myunxenliklar o‘z takliflarini yaxshilash niyatida emas. Klub nuqtai nazaridan ular Saneni saqlab qolish uchun hamma narsani qilishgan.

Sanening shartnomasi shu yozda tugaydi va endi uning ketishi ham istisno qilinmayapti. Malumotlarga ko‘ra, vingerning o‘zi Angliyaga qaytishga tayyor.

Bild nashrining yozishicha, yaqinda agent o‘zgarishiga Leroyning sherigi Kendis Bruk ham ta’sir ko‘rsatgan. U Londonning ashaddiy muxlisi va u yerda Leroy va ularning farzandlari bilan yashashni orzu qiladi.

Futbolchiga "Arsenal" va "Chelsi" klublari qiziqish bildirmoqda. Pini Zaxavi London klublari bilan ajoyib aloqaga ega.