17 maydan yurtimiz bo‘ylab “Yangi O‘zbekiston Olimpiya cho‘qqilari” sport musobaqasi start oladi. Kecha Sport vazirligida ushbu yangi formatdagi musobaqaga tayyorgarlik masalalariga bag‘ishlangan selektor yig‘ilishi bo‘lib o‘tdi.
Unda joylarda bellashuvlarni samarali tashkil etish, musobaqa dasturi, tanlangan sport bazalarining holati hamda g‘olib va sovrindorlarni rag‘batlantirishga doir muhim masalalar muhokama qilindi.
Rasmiylar bu musobaqa milliy sportimizda yangi burilish yasashini ta’kidlab, asosiy maqsad — milliy terma jamoa uchun raqobatbardosh va iqtidorli yoshlarni saralab olish, yoshlar orasida ommaviy sport targ‘ibotini kuchaytirish ekanini qayd etishdi.
Yig‘ilishda hududiy vakillar bilan onlayn muloqot o‘rnatilib, tayyorgarlik jarayoni, mavjud muammolar va kamchiliklar muhokama qilindi. Mutasaddilarga aniq vazifalar belgilab berildi va kamchiliklarni zudlik bilan bartaraf etish bo‘yicha topshiriqlar berildi.
Tadbir davomida Sport vazirligi va Milliy Olimpiya qo‘mitasining bo‘lajak musobaqalarni yuqori saviyada o‘tkazish bo‘yicha qo‘shma qarori imzolandi.
