“Bayer” yarim himoyachisi Florian Virs o‘z kelajagi borasida qaror qabul qildi. Unga ko‘ra, futbolchi yaqin atrofidagilarga jumladan, jamoa bosh murabbiyi Xabi Alonsoga ham o‘z orzusidagi klubni aytgan.
Manbada aytilishicha, Virs na Angliya Premyer Ligasi, na La Liga jamoalarini tanlagan. Virsning asosiy maqsadi — “Bavariya” safida to‘p tepish.
Shunga qaramay, “Bayer” futbolchini osonlikcha qo‘yib yubormoqchi emas. Klub bosh direktori Fernando Karro Virsni 150 million yevro evaziga qo‘yib yuborishini ma’lum qilgan edi. Avvalroq Florianga “Real Madrid” hamda “Manchester Siti” qiziqish bildirgan edi, lekin u bu takliflarni rad etgan.
Virsning oilasi ham uni Germaniyada qolishini istamoqda. Bild nashrining yozishicha, futbolchining otasi Hans Virs so‘nggi oylar davomida “Bavariya” bilan bir necha bor uchrashgan va allaqachon dastlabki kelishuvga erishilgani aytilmoqda.
21 yoshli futbolchi joriy mavsum “Bayer”ning asosiy yulduzlaridan biri bo‘ldi. U 49 o‘yinda ishtirok etib, o‘z hisobiga 18 ta gol va 19 ta golli uzatma yozdirib qo‘ygan.
