"Komo" yarim himoyachisi Nikolas Pas yaqin haftalar ichida Madridning "Real" klubiga qaytishi mumkin.
O‘tgan yozda "qaymoqranglilar" istiqbolli argentinalikni A Seriyaga sotib yuborgan va unga birinchi navbatda qayta sotib olish huquqini qo‘shib bergandi. Jurnalist Migel Anxel Diasning yangilangan ma’lumotlariga ko‘ra, shu haftadayoq "Real" vakillari va Pasning agenti o‘rtasida uchrashuv bo‘lib o‘tadi - tomonlar futbolchining qaytishi masalasini muhokama qiladi. Agar kelishuvga erishilsa, 20 yoshli hujumkor yarim himoyachi madridliklar safida iyun oyida bo‘lib o‘tadigan klublar o‘rtasidagi jahon chempionatida ishtirok etishi mumkin.
Nikolas Pas Italiya chempionatining joriy mavsumida 34 ta o‘yinda maydonga tushib, 6 ta gol urdi va 9 ta golli uzatmani amalga oshirdi.
