"Yuventus" Damyen Komollini bosh direktor etib tayinlanganini e’lon qildi.
52 yoshli fransuz bu vazifani 4 iyundan boshlaydi.
"Damyen Komolli boy xalqaro tajribaga ega, o‘ttiz yildan ortiq vaqt davomida Yevropa futbolining eng yuqori darajasida mustahkam texnik, boshqaruv va strategik bazaga ega yetakchi hisoblanadi.
U "Arsenal", "Tottenxem", "Liverpul", "Fenerbaxche" va yaqinda "Tuluza" kabi nufuzli klublarda muhim lavozimlarni egallab, ular bilan Liga 1 va Fransiya kubogiga ko‘tarilishga erishgan. Damyen Komolli erkaklar futboli bo‘limi, shuningdek, marketing va tijorat bo‘limlarini nazorat qiladi.
Klub afsonasi Djordjo Kyellini unga futbol strategiyasi direktori sifatida yordam beradi va "Yuventus"ning qadriyatlari va ruhini o‘zida mujassamlashtirishda muhim rol o‘ynaydi", — deyiladi klub bayonotida.
"Men o‘z tarixi, o‘ziga xosligi va ambisiyali qarashlari bilan ajralib turadigan klubga qo‘shilganimdan nihoyatda baxtiyor va sharafliman. Birinchi kundan boshlab men "Yuventus"ga g‘alaba qozonish uchun barcha tajribamni beraman, bu har doim klubning ruhi va muxlislarimiz haqli ravishda kutganidek", - deydi Komolli.
