Armaniston poytaxti Yerevanda sport va jangovar sambo yo‘nalishlari bo‘yicha jahon kubogi bahslari o‘tkazilmoqda.
Kecha mukofot jamg‘armasi 196 ming AQSH dollaridan iborat bo‘lgan turnirning ilk kunida sport va jangovar sambo yo‘nalishlarining 14 ta vaznida bellashuvlar bo‘lib o‘tdi.

O‘zbekiston terma jamoasi a’zolaridan Ilhom Parmonov (-58), A’zam Rashidov(-64), Ubaydullo Mo‘minov(-71) va Asqarbek Avganov(-88) ortda qolgan kungi bahslarda g‘oliblik uchun kurash olib bordi.

Murosasiz bellashuvlar natijasida mahoratli sambochilarimizdan Ilhom Parmonov -58 kilogrammdagi bahslarda yarim final ostonasigacha yetib keldi. Bronza medali uchun kurashda gruziyalik Irakliy Kupatadzega kichik hisobda imkoniyatni boy berib, 4-o‘rin bilan kifoyalandi.

-64 kilogramm vaznda Vatanimiz sharafini himoya qilgan A’zam Rashidov bellashuvlar davomida Rossiya, Gruziya, Turkmaniston kabi davlat vakillarini mag‘lub etdi. Final bellashuvida qozog‘istonlik Jondas Beysenbayevni taslim etdi va oltin medalga sazovor bo‘ldi.

Bugun, 8 iyun kuni jahon kubogining so‘nggi kunida 14 ta vazn toifasida kurashlar tashkil etiladi. Terma jamoamiz a’zolaridan Ro‘zmatboy Rahimberganov  jangovar sambo yo‘nalishining -71 kilogramm vaznida o‘tkaziladigan kurashlarda ishtirok etadi.

Eslatib o‘tamiz, jahon kubogida g‘oliblikka erishgan sambochilar 3 ming, 2-o‘rin sohiblari 2 ming va 3-o‘rinni egallagan sportchilar ming AQSH dollari bilan taqdirlanadi.