O‘zbekistonlik aralash jang san’ati ustasi, 31 yoshli Nursulton Ro‘ziboyev 16 avgust kuni AQSHning Chikago shahrida bo‘lib o‘tadigan UFC 319 turniri doirasida oktagonga ko‘tariladi.

Ro‘ziboyevning raqibi amerikalik Brayan Battle bo‘ladi. 30 yoshli Battle UFC’da 2021 yil 28 avgustdan beri faoliyat yuritib kelmoqda. Hozirgacha u promoushenda 7 ta g‘alaba, 1 ta mag‘lubiyat va 1 ta NC (jang o‘tkazilmagan) natijalarini qayd etgan. U so‘nggi jangini 2024 yil 7 dekabrda Rendi Braunga qarshi o‘tkazgan va hakamlarning yakdil qaroriga ko‘ra g‘alaba qozongan.

Oldinroq OAVlarda Nursulton Ro‘ziboyev UFC 319 doirasida polshalik Mixal Olekseychukka qarshi maydonga chiqishi haqida xabarlar tarqalgandi, ammo bu ma’lumot rasmiy tasdiqdan o‘tmadi.

Ro‘ziboyev hozirga qadar faoliyati davomida 47 ta jang o‘tkazib, ulardan 36 tasida g‘alaba qozongan, 9 marta mag‘lub bo‘lgan va 2 marta durang qayd etgan. Brayan Battlega qarshi bahs Ro‘ziboyevning UFC’dagi oltinchi jangiga aylanadi. Bungacha u ushbu promoushenda 5 marotaba oktagonga ko‘tarilib, 4 ta g‘alaba va 1 ta mag‘lubiyat qayd etgan.

Eslatib o‘tamiz, UFC 319 turnirining asosiy kartida mashhur jangchilar Hamzat Chimayev va Drikus Dyu Plessi oktagonga chiqadi.