Ўзбекистонлик аралаш жанг санъати устаси, 31 ёшли Нурсултон Рўзибоев 16 август куни АҚШнинг Чикаго шаҳрида бўлиб ўтадиган UFC 319 турнири доирасида октагонга кўтарилади.

Рўзибоевнинг рақиби америкалик Брайан Баттле бўлади. 30 ёшли Баттле UFC’да 2021 йил 28 августдан бери фаолият юритиб келмоқда. Ҳозиргача у промоушенда 7 та ғалаба, 1 та мағлубият ва 1 та NC (жанг ўтказилмаган) натижаларини қайд этган. У сўнгги жангини 2024 йил 7 декабрда Ренди Браунга қарши ўтказган ва ҳакамларнинг якдил қарорига кўра ғалаба қозонган.

Олдинроқ ОАВларда Нурсултон Рўзибоев UFC 319 доирасида полшалик Михал Олексейчукка қарши майдонга чиқиши ҳақида хабарлар тарқалганди, аммо бу маълумот расмий тасдиқдан ўтмади.

Рўзибоев ҳозирга қадар фаолияти давомида 47 та жанг ўтказиб, улардан 36 тасида ғалаба қозонган, 9 марта мағлуб бўлган ва 2 марта дуранг қайд этган. Брайан Баттлега қарши баҳс Рўзибоевнинг UFC’даги олтинчи жангига айланади. Бунгача у ушбу промоушенда 5 маротаба октагонга кўтарилиб, 4 та ғалаба ва 1 та мағлубият қайд этган.

Эслатиб ўтамиз, UFC 319 турнирининг асосий картида машҳур жангчилар Ҳамзат Чимаев ва Дрикус Дю Плесси октагонга чиқади.