"Real" Klublar o‘rtasidagi jahon chempionati guruh bosqichi 1-turida "Al-Hilol" bilan durang o‘ynadi - 1:1.
Uchrashuvning 34-daqiqasida "qaymoqranglilar" forvardi Gonsalo Garsiya hisobni ochdi. Saudiyaliklar 7 daqiqadan so‘ng javob golini kiritishdi, penaltini Ruben Nevesh aniq amalga oshirdi.
Yakunda "Real"ga g‘alabani Federiko Valverde olib kelishi mumkin edi, ammo u penaltini aniq amalga oshira olmadi - urugvaylik futbolchining zarbasini "Al-Hilol" darvozaboni Yassin Bunu qaytardi.
"Real" jamoaning yangi bosh murabbiyi Xabi Alonso qo‘l ostida ilk o‘yinini o‘tkazdi. Shuningdek, himoyachilar Din Xeysen va Trent Aleksandr-Arnold ham jamoa safida debyut qilishdi.
Klublar o‘rtasidagi JCH-2025ning navbatdagi o‘yinida madridliklar Meksikaning "Pachuka" jamoasiga qarshi maydonga tushadi. "Al-Hilol" 23 iyun kuni Avstriyaning "Zalsburg" klubiga qarshi maydonga tushadi.
