O‘zbekiston terma jamoasi va Rimning “Roma” klubi hujumchisi Eldor Shomurodov faoliyatini Fransiya chempionatida davom ettirishi mumkin. Footmercato nashrining xabariga ko‘ra, “Renn” klubi skauti Loik Dezire futbolchi haqida dastlabki ma’lumotlarni yig‘gan.

Manbaga ko‘ra, “Renn” hali “Roma” bilan muzokaralarni boshlamagan. Bunga sabab — ular Istanbulning “Bashakshehir” klubi Shomurodovni o‘z safiga qo‘shib olish uchun jiddiy harakat qilayotganini yaxshi bilishadi. Shu bois fransuz klubi vaziyatni diqqat bilan kuzatmoqda. Agar hujumchi istanbulliklar bilan shartnoma imzolamasa, “Renn” rasmiy taklif bilan chiqishi mumkin.

Ma’lumotlarga ko‘ra, “Bashakshehir” Shomurodov uchun “Roma”ga 7 million yevrolik taklif yuborgan. Turk matbuotida tarqalgan xabarlarga ko‘ra, bu transfer kelgusi haftalarda ijobiy yakunlanishi mumkin.

Eslatib o‘tamiz, avvalroq Shomurodov ayni paytda Istanbulda ekani va klub bilan barcha shartlar bo‘yicha kelishuvga erishgani xabar qilingandi. Yaqin kunlarda u bilan rasmiy shartnoma imzolanishi kutilmoqda.

Ma’lumot uchun, Shomurodov 2024/25 yilgi mavsumda “Roma” safida 37 ta uchrashuvda maydonga tushib, 7 ta gol va 5 ta golli uzatmaga mualliflik qilgan. Transfermarkt portali futbolchining qiymatini 5 million yevroga baholamoqda.