"Arsenal" o‘zining rasmiy saytida chap qanot himoyachisi Maylz Lyuis-Skelli bilan shartnomani uzaytirgani haqida ma’lumot joylashtirdi. 18 yoshli futbolchi o‘tgan mavsumning haqiqiy kashfiyoti bo‘ldi. "Kanonirlar"ning asosiy jamoasi uchun Lyuis-Skelli 39 ta o‘yinda maydonga tushib, bitta gol urgan va sheriklariga ikkita golli uzatmani amalga oshirgan.
Lyuis-Skellining yangi shartnomasi qancha muddatga tuzilganini "Arsenal" matbuot xizmati ma’lum qilmagan. "To‘pchilar" uchun bu odatiy hol. Matbuotda aytilishicha, mehnat shartnomasi besh mavsumga - 2030 yilning o‘rtalariga qadar mo‘ljallangan.
