Angliyaning “Manchester Yunayted” klubi “Real Madrid” yarim himoyachisi Orelyen Tchuameni transferi yuzasidan rasmiy taklif bilan chiqdi. Bu haqda El Chiringuito nashri xabar berdi.

Manbalarga ko‘ra, “qizil iblislar” fransiyalik futbolchini 90 million yevro evaziga sotib olmoqchi. Biroq “Real Madrid” ustozi Xabi Alonso bu transferga rozilik bermagan. Klub ichki manbalariga ko‘ra, Tchuameni bosh murabbiy tomonidan “tegib bo‘lmas” futbolchi sifatida ko‘rilmoqda.

“Manchester Yunayted” bosh murabbiyi Rubin Amorim fransiyalik futbolchini tayanch yarim himoya chizig‘ida sinab ko‘rmoqchi. Bundan tashqari, futbolchining turli pozisiyalarda o‘ynay olish qobiliyati klub rahbariyatining e’tiborini tortmoqda.

Shuningdek, “qizil iblislar” “Real Madrid”ning braziliyalik hujumchisi Rodrigoga ham qiziqish bildirmoqda. Hozirda Premyer Liganing bir nechta jamoalari ushbu futbolchiga xaridor bo‘lib turibdi. Hujumchining klubdan ketish ehtimoli yuqori. Sababi Rodrigo ko‘proq o‘yin amaliyotiga ega bo‘lishni istaydi.

Ma’lumot uchun, har ikki futbolchi — Tchuameni va Rodrigoning ham “Real” bilan shartnomasi 2028 yilning yoziga qadar amal qiladi.