Finlyandiyaning XIK jamoasi Konferensiyalar Ligasi saralash bosqichida Farer orollarining «Runavik» jamoasiga qarshi bahsda haqiqiy g‘alabali kambekni amalga oshirdi!
Bir hafta avval Farer orollarida o‘tgan birinchi o‘yinda maydon egalari 4:0 hisobida g‘alaba qozongan va fin jamoasida bir futbolchi maydondan haydalgan edi. Hamma narsa tugagandek tuyulgandi.
Biroq kecha, javob o‘yinida, 15-daqiqada «Runavik» futbolchisi Fabian Ness qizil kartochka oldi va XIK raqib darvozasini haqiqiy o‘qqa tutishni boshladi — jamoa 60 marta darvoza tomon zarba berdi!
Natijada, 90+4-daqiqada XIK 4:0 hisobini qayd etib, o‘yinni qo‘shimcha vaqtga olib o‘tdi. Ekstra-taymda esa Xelsinki jamoasi beshinchi golni urdi va keyingi bosqichga yo‘l oldi.
Taniqli futbolchi Teemu Pukki maydonda 97 daqiqa o‘ynadi, lekin gol ura olmadi. Ammo u muxlislarga uzoq vaqt yodda qoladigan kambekni sovg‘a qilishga yordam berdi.
