Финляндиянинг ХИК жамоаси Конференциялар Лигаси саралаш босқичида Фарер оролларининг «Рунавик» жамоасига қарши баҳсда ҳақиқий ғалабали камбэкни амалга оширди!
Бир ҳафта аввал Фарер оролларида ўтган биринчи ўйинда майдон эгалари 4:0 ҳисобида ғалаба қозонган ва фин жамоасида бир футболчи майдондан ҳайдалган эди. Ҳамма нарса тугагандек туюлганди.
Бироқ кеча, жавоб ўйинида, 15-дақиқада «Рунавик» футболчиси Фабиан Несс қизил карточка олди ва ХИК рақиб дарвозасини ҳақиқий ўққа тутишни бошлади — жамоа 60 марта дарвоза томон зарба берди!
Натижада, 90+4-дақиқада ХИК 4:0 ҳисобини қайд этиб, ўйинни қўшимча вақтга олиб ўтди. Экстра-таймда эса Хельсинки жамоаси бешинчи голни урди ва кейинги босқичга йўл олди.
Таниқли футболчи Теему Пукки майдонда 97 дақиқа ўйнади, лекин гол ура олмади. Аммо у мухлисларга узоқ вақт ёдда қоладиган камбэкни совға қилишга ёрдам берди.
