"Barselona"ning yangi hujumchisi Markus Reshford bugun, 27 iyul kuni bo‘lib o‘tadigan "Vissel Kobe"ga qarshi o‘rtoqlik o‘yini oldidan Yaponiyadagi ilk mashg‘ulotida jamoadoshlarini hayratda qoldirdi. Ta’kidlanishicha, mashg‘ulot davomida ingliz "o‘zining katta iste’dodini ko‘rsatgan". Bu haqda Marca xabar bermoqda.

Manbaga ko‘ra, "ko‘k-anorranglilar" futbolchilari 27 yoshli vingerning ajoyib formada ekani va o‘yinlarda "Barselona" safida maydonga tushishga tayyorligini qayd etishgan.

Kataloniya klubi 23 iyul, chorshanba kuni Reshfordni "Manchester Yunayted"dan ijaraga olganini e’lon qildi. "Barselona" hujumchini 30+5 mln yevroga sotib olishi mumkinligi haqida xabarlar tarqalgan edi.