"Barselona" bosh murabbiyi Xans-Diter Flik Yaponiyaning "Vissel Kobe" jamoasiga qarshi o‘tkazilgan va kataloniyaliklarning 3:1 hisobidagi g‘alabasi bilan yakunlangan nazorat uchrashuvidan so‘ng, hujumchi Markus Reshfordning nima uchun cheklangan o‘yin vaqtiga ega bo‘lganini tushuntirdi.
- U tayyorgarlikda biroz orqada qolmoqda - mashg‘ulotlarni kechroq boshlagan. Hozircha uning mashqlari ko‘p bo‘lmagani sababli, ehtiyotkorlik bilan yondashishga va unga g‘amxo‘rlik qilishga qaror qildik, - deya Flikning so‘zlarini keltiradi Kataloniya klubi matbuot xizmati.
Eslatib o‘tamiz, Ispaniya jamoasi "Manchester Yunayted"dan vingerni keyinchalik sotib olish huquqi bilan ijaraga olgan. "Vissel Kobe"ga qarshi o‘yinda futbolchi taxminan yarim soat maydonda harakat qildi va almashtirildi.
