Ispaniyaning “Real Madrid” klubi hujumkor yarim himoyachisi Braim Dias faoliyatini Italiya A Seriyasida davom ettirishi mumkin. Bu haqda Fichajes nashri xabar berdi.

Manbaga ko‘ra, “qirollik klubi” yozgi transfer oynasi vaqtida argentinalik vinger Franko Mastantunoni xarid qildi. Shuningdek, Rodrigo ham jamoada qolishni istamoqda. Bu holat Braim Diasning asosiy tarkibda maydonga tushish imkoniyatini pasaytirishi mumkin. Futbolchining o‘zi ham klubdagi raqobat katta ekanligini tushunib turibdi va ko‘proq o‘yin amaliyotiga ega bo‘lish uchun jamoani tark etishga tayyor.

Diasning avvalgi jamoasi — “Milan” futbolchini ortga qaytarish imkoniyatini jiddiy ko‘rib chiqmoqda. Marokashlik futbolchi avvalroq “rossonerilar” safida ijarada o‘ynagan. Shu bilan birga, “Napoli” va “Inter” klublari ham 26 yoshli futbolchining xizmatlariga qiziqish bildirmoqda.

Qayd etilishicha, A Seriyaning yetakchi klublari Braim Diasni 40 million yevro evaziga sotib olishga tayyor. Biroq “Real Madrid” rahbariyati futbolchining qiymatini 50 million yevroga baholamoqda.

Braim Dias 2024/25 yilgi mavsum “Real Madrid” safida jami 56 ta o‘yinda maydonga tushib, o‘z hisobiga 6 ta gol va 8 ta golli uzatma yozdirib qo‘ygan.     Uning klub bilan shartnomasi 2027 yilning yoziga qadar amal qiladi.