"Monako"ning yozgi yangi transferi, yarim himoyachi Pol Pogba o‘zining rejalari haqida fikr bildirdi. 32 yoshli futbolchining aytishicha, u eng yaxshi formaga kirishni maqsad qilgan.
Avvalroq "Monako"da Pogba o‘ynashdan oldin formaga kirishi kerakligi ta’kidlangan edi.
"Bu jarayonda bosqichlar bor, men uchun eng muhimi - yaxshilab tayyorgarlik ko‘rish. Men maydonga chiqib, o‘zimni yo‘qotib qo‘yishni, Pol Pogba bo‘lmay qolishni istamayman. Hamma kutmoqda, barcha buyuk Pol Pogbani maydonda ko‘rishni xohlaydi. Men aynan shunga tayyorgarlik ko‘ryapman," - deya Pogba BeIN Sports’ga ma’lum qildi.
Eslatib o‘tamiz, Pol Pogba ancha vaqtdan beri o‘yinlarda ishtirok etmayapti. Mart oyida uning antidoping qoidalarini buzgani uchun olgan diskvalifikasiyasi muddati tugadi. Diskvalifikasiya bir yarim yilga cho‘zilgan edi.
