O‘zbekiston Superligasining 19-turidan o‘rin olgan “Navbahor” – “Neftchi” (0:1) uchrashuvidan keyingi matbuot anjumanining ikkinchi qismida farg‘onaliklar bosh murabbiyi Vitaliy Levchenko qatnashib, jsurnalistlarning savollariga javob berdi.

- Dastlab o‘yin haqida fikrlaringiz bilan o‘rtoqlashsangiz?

- Bugun haqiqiy futbolga mos muhit bo‘ldi. Stadionga juda ko‘p muxlislar tashrif buyurishdi. “Navbahor”ga qarshi qiyin bahsni o‘tkazdik. G‘alaba qozonishimiz oson bo‘lmadi. Ushbu yutuq bilan jamoamizdagi barchani tabriklayman. Ishlashda davom etamiz, chempionat hali tugagani yo‘q.

- Nima deb o‘ylasiz, legionerlar o‘zlarini yaxshi his qilishyaptimi?

- Biz shunday yo‘l tutyapmizki, jamoada hech kimni ajratayotganimiz yo‘q. Shuningdek, legionerlar ham bu yerda o‘zlarini erkin his qilishlari uchun yordam beryapmiz. Jamoada raqobat bor va bu juda yaxshi. Kim kuchli bo‘lsa, o‘sha o‘ynayapti.

- “Neftchi” joriy mavsumda chempionlik uchun kurashadimi?

- Biz maydonga chiqib, o‘z o‘yinimizni ko‘rsatamiz hamda har bir raqib bilan kurash olib boramiz. Shunchaki futbol o‘ynamaymiz. Lekin chempion bo‘lishimizni vaqt ko‘rsatadi.

- Bugungi muxlislik darajasini 10 ballik tizimda qanday baholagan bo‘lardingiz?

- Bemalol aytishim mumkin, vodiyning har uchala klubi – “Andijon”, “Navbahor” va “Neftchi”da muxlislik darajasi juda yuqori. Eng ko‘p muxlislar ham, eng zo‘r muxlislar ham shu yerda. Vodiyda ajoyib ishqibozlar bor, bunga qoyil qolish kerak.