Ispaniya La Ligasining 2-turidan o‘rin olgan "Levante" - "Barselona" uchrashuvi yakuniga yetdi. Jamoalar Valensiyadagi «Syudad de Valensiya» stadionida kuch sinashishdi. Uchrashuv bosh hakami vazifasini Alexandro Ernandes Ernandes bajardi. O‘yinda 3:2 hisobida kataloniyaliklar irodali g‘alabani qo‘lga kiritdi.

Uchrashuvning 15-daqiqasida hujumchi Ivan Romero "Levante"ni oldinga olib chiqdi. 45+7-daqiqada yarim himoyachi Xose Luis Morales penaltidan unumli foydalanib, mezbonlarning ikkinchi goliga mualliflik qildi. 49-daqiqada yarim himoyachi Pedri oradagi farqni qisqartirdi. 52-daqiqada "Barselona" hujumchisi Ferran Torres hisobni tenglashtirdi. 90+1-daqiqada vinger Lamin Yamalning uzatmasini himoyachi Unay Elxesabal o‘z darvozasiga joylab qo‘ydi.

Ikki o‘yindan so‘ng "Barselona" hisobida 6 ochko mavjud. "Ko‘k-anorranglilar" Ispaniya chempionati turnir jadvalida birinchi o‘rinni egallab turibdi. Mavsum startida ikkita mag‘lubiyatga uchragan "Levante" 18-pog‘onadan joy olgan.