Испания Ла Лигасининг 2-туридан ўрин олган "Леванте" - "Барселона" учрашуви якунига етди. Жамоалар Валенсиядаги «Сьюдад де Валенсия» стадионида куч синашишди. Учрашув бош ҳаками вазифасини Алехандро Эрнандес Эрнандес бажарди. Ўйинда 3:2 ҳисобида каталонияликлар иродали ғалабани қўлга киритди.
Учрашувнинг 15-дақиқасида ҳужумчи Иван Ромеро "Леванте"ни олдинга олиб чиқди. 45+7-дақиқада ярим ҳимоячи Хосе Луис Моралес пенальтидан унумли фойдаланиб, мезбонларнинг иккинчи голига муаллифлик қилди. 49-дақиқада ярим ҳимоячи Педри орадаги фарқни қисқартирди. 52-дақиқада "Барселона" ҳужумчиси Ферран Торрес ҳисобни тенглаштирди. 90+1-дақиқада вингер Ламин Ямалнинг узатмасини ҳимоячи Унай Эльхесабаль ўз дарвозасига жойлаб қўйди.
Икки ўйиндан сўнг "Барселона" ҳисобида 6 очко мавжуд. "Кўк-анорранглилар" Испания чемпионати турнир жадвалида биринчи ўринни эгаллаб турибди. Мавсум стартида иккита мағлубиятга учраган "Леванте" 18-поғонадан жой олган.
