"Barselona" futbolchisi Rafinya Dias La Liga 2-turidan o‘rin olgan "Levante"ga (3:2) qarshi o‘yindan so‘ng o‘z fikrlari bilan o‘rtoqlashdi.

Braziliyalik futbolchi golli uzatmani amalga oshirdi va "ko‘k-anorranglilar"ga birinchi bo‘limdagi muvaffaqiyatsizlikdan so‘ng o‘yinda burilish yasashga yordam berdi.

"Bunday o‘yinlarda qiyin bo‘lishini bilamiz, ammo bunday g‘alabalar chempionlik olib kelishini ham bilamiz. Ko‘pchilik o‘yinlarimizni ana shunday tomosha uchun, kambek uchun ko‘radi. Juda muhim g‘alaba. Oxir-oqibat, qancha ko‘p ochko to‘plasak, chempionlik uchun kurashish imkoniyatimiz shuncha yuqori bo‘ladi", - deya Rafinyaning so‘zlarini keltirmoqda ispan OAV.