Madridning «Real» klubi bosh murabbiyi Xabi Alonso La Liganing ikkinchi turida «Ovyedo»ga qarshi kechgan (3:0) uchrashuvdan so‘ng jamoa o‘yini haqida fikr bildirdi va alohida tarzda hujumchi Vinisius Juniorni ta’kidlab o‘tdi.

«Men juda mamnunman, bu juda muvozanatli o‘yin bo‘ldi. Vinisius (gol+assist) hal qiluvchi omilga aylandi va men undan xursandman. Biz uchun barcha futbolchilar muhim — asosiy tarkibda maydonga tushganlar ham, zaxiradan kirganlar ham. Oldinda ko‘p o‘yinlar bor va har bir o‘yinchi uchun imkoniyat topiladi.

Barcha futbolchilar o‘zlarini jamoa uchun ahamiyatli his etishlari va tayyor holda bo‘lishlari kerak: asosiy tarkibda o‘ynashga ham, zaxiradan maydonga tushishga ham yoki keyingi o‘yinda qatnashishga ham. Bu jamoaning barqarorligiga xizmat qiladi, alohida futbolchilarga emas», — deya Alonsonng so‘zlarini keltiradi "Marca".

Eslatib o‘tamiz, madridliklar navbatdagi uchrashuvini 30 avgust kuni o‘z maydonida «Malyorka»ga qarshi o‘tkazadi.