Мадриднинг «Реал» клуби бош мураббийи Хаби Алонсо Ла Лиганинг иккинчи турида «Овьедо»га қарши кечган (3:0) учрашувдан сўнг жамоа ўйини ҳақида фикр билдирди ва алоҳида тарзда ҳужумчи Винисиус Жуниорни таъкидлаб ўтди.
«Мен жуда мамнунман, бу жуда мувозанатли ўйин бўлди. Винисиус (гол+ассист) ҳал қилувчи омилга айланди ва мен ундан хурсандман. Биз учун барча футболчилар муҳим — асосий таркибда майдонга тушганлар ҳам, захирадан кирганлар ҳам. Олдинда кўп ўйинлар бор ва ҳар бир ўйинчи учун имконият топилади.
Барча футболчилар ўзларини жамоа учун аҳамиятли ҳис этишлари ва тайёр ҳолда бўлишлари керак: асосий таркибда ўйнашга ҳам, захирадан майдонга тушишга ҳам ёки кейинги ўйинда қатнашишга ҳам. Бу жамоанинг барқарорлигига хизмат қилади, алоҳида футболчиларга эмас», — дея Алонсоннг сўзларини келтиради "Marca".
Эслатиб ўтамиз, мадридликлар навбатдаги учрашувини 30 август куни ўз майдонида «Мальорка»га қарши ўтказади.













