Bugun poytaxtimizdagi “Hilton” mehmonxonasi anjumanlari zalida O‘zbekiston Superkubogi-2025 uchrashuviga rasmiy mehmon sifatida taklif etilgan Jahon futboli afsonalari bilan matbuot anjumani bo‘lib o‘tdi.

Anjumanni O‘zbekiston futzal federasiyasi prezidenti Bakzod Mamaqulov kirish so‘zi bilan ochib berdi. O‘FF rahbari mamlakatimizda futbol taraqqiyoti muhtaram yurtboshimiz rahnamoligida yangi bosqichga ko‘tarilgani, buning samarasi o‘laroq O‘zbekiston terma jamoalarining xalqaro maydonlarda qo‘lga kiritayotgan yutuqlari salmoqli bo‘layotganini ta’kidlab o‘tdi.

"Xususan, milliy terma jamoamiz ilk marta Jahon chempionatiga yo‘llanma oldi, o‘tgan mavsum Olimpiya terma jamoamiz to‘rt yillikning eng nufuzli tadbiri – Yozgi Olimpiadada debyut qildi, yoshlar va o‘smirlar terma jamoalarimizning jahon va qit’a musobaqalaridagi yutuqlari muxlislarimiz kutganidek, odatiy holga aylanib borayapti. O‘z navbatida futzal bo‘yicha O‘zbekiston Superkubogi uchrashuviga Jahon futboli afsonalarining taklif etilishi futbolsevar xalqimiz uchun Mamlakatimiz Mustaqilligining 34-yilligi tantanalari oldidan o‘ziga xos to‘hfa bo‘ldi, — deb qayd etdi B.Mamatqulov.

Jahon futboli afsonalari bilan erkin, samimiy ruhda o‘tgan matbuot anjumanida ommaviy axborot vositalari vakillari o‘zlarini hamda muxlislarni qiziqtirayotgan barcha savollariga atroflicha javob olishdi.

Savol: — Zamonaviy futbolda himoya chizig‘i qanchalik kuchaygan? Siz o‘ynagan va jahon chempioni bo‘lgan davrdagi Italiya terma jamoasi kuchlimi yoki ayni paytda faoliyat yuritayotganimi?

Fabio Kannavaro: — Mening fikrimcha 2006-yilda jahon chempioni bo‘lgan terma jamoamiz kuchliroq edi. Boisi hamma chiziqda eng mahoratli, betakror o‘yinchilar jamlanishgandi. Bejizga chempion bo‘lmaganmiz.

Zamonaviy futbolda himoya qanchalik kuchaygan degan savol ancha keng qamrovli. Hozirgi futbolda himoyachi faqat to‘pni olib yurgan raqibga qarshi o‘ynamasdan, butun maydonni va unda bo‘ladigan voqealar rivojini oldinda ko‘ra bilishi kerak. Boshqacha aytganda butun maydonni nazorat etib turishi lozim. Ayni paytda himoyachining vakolat doirasi kengaygan.