«Qayrat» bosh murabbiyi Rafael Urazbaxtin jamoasining Chempionlar ligasi umumiy bosqichi qur’asi natijalariga munosabat bildirdi. Ushbu bosqichda qozog‘istonlik klub Madridning «Real»i (o‘z maydonida), «Inter», «Bryugge» (o‘z maydonida), «Arsenal», «Olimpiakos» (o‘z maydonida), «Sporting», «Pafos» (o‘z maydonida) va «Kopengagen»ga qarshi bahs olib boradi.

«Albatta, «Real» bilan o‘ynash imkoniyati paydo bo‘lganidan xursandmiz. Bunday klubning Qozog‘istonga kelishini hayotda ko‘p ham ko‘ravermaysan. Xabarni eshitganda juda quvondik. Iltimos qilardikki, raqib sifatida iloji boricha ko‘proq grandlar chiqsin. Aslida «Real», «Inter», «Arsenal» yetarlicha yirik klublar. Ularga qarshi maydonga tushish imkoniyati borligidan mamnunmiz.

Qur’a natijalaridan rozimiz. «Real» — o‘z izohlariga hojat yo‘q klub. «Inter» oxirgi yillarda muntazam ravishda Chempionlar ligasida o‘ynab kelmoqda. «Arsenal» ham yaqinda yarim finalda o‘ynadi va Angliyada chempionlik uchun kurashib kelmoqda. «Bryugge», «Sporting», «Olimpiakos», «Pafos» va «Kopengagen» ham o‘z mamlakatlarida chempion bo‘lgan kuchli jamoalar. Umumiy daraja juda yuqori.

Albatta, biz ularga nisbatan kichik jamoadek ko‘rinamiz. Ammo futbolda hamma narsa mumkin. O‘z uyimizdagi o‘yinlarda tribuna va muxlislarga umid qilamiz. Qachon va qanday ob-havoda o‘ynashimiz ham muhim omil. Shuningdek, ular Yevropadan bizga uzoq yo‘l bosib kelishlari kerak bo‘ladi. Omillar ko‘p. Lekin baribir raqib futbolchilarning darajasi juda baland, shu sabab ularga parvozlar jiddiy muammo tug‘diradi, deb o‘ylamayman. Biz esa maydonda oxirigacha kurashamiz va barcha kuchimizni sarflaymiz», — dedi Urazbaxtin «Chempionat» muxbiri Yegor Kabak bilan suhbatda.