“Manchester Siti” va Norvegiya terma jamoasi hujumchisi Erling Holand kutilmagan hodisa tufayli jarohat oldi. Bu haqda “Goal.com”nashri xabar berdi.

Ma’lumotlarga ko‘ra, jamoa futbolchilari Oslodagi mehmonxona oldida avtobusdan tushayotgan paytda eshik keskin ochilib, “Manchester Siti” hujumchisining yuziga tekkan. Hodisaga guvoh bo‘lganlar aytishicha, futbolchi og‘riqdan jahli chiqib, qo‘pol so‘z ishlatgan.

Keyinchalik futbolchi ijtimoiy tarmoqdagi sahifasiga jarohat sabab shishgan lablari aks etgan suratini joyladi. Rasm ostiga “uchta chok”, deya izoh qoldirgan. Biroq bu post ko‘p o‘tmay o‘chirib tashlangan.

Eslatib o‘tamiz, Norvegiya terma jamoasi Jahon chempionati saralashi 6-turi doirasida Moldovaga qarshi bahs olib boradi. Bellashuv 9 sentyabr kuniga belgilangan. Ayni paytda jamoa mundial yo‘llanmasini qo‘lga kiritishga yaqin turibdi. Ular I guruhida 12 ochko bilan yakka peshqadamlik qilmoqda. Keyingi o‘rinlarda Isroil (9 ochko), Italiya (6 ochko), Estoniya (3 ochko) va Moldova (0 ochko) terma jamoalari joy olgan.