“Манчестер Сити” ва Норвегия терма жамоаси ҳужумчиси Эрлинг Ҳоланд кутилмаган ҳодиса туфайли жароҳат олди. Бу ҳақда “Goal.cоm”нашри хабар берди.
Маълумотларга кўра, жамоа футболчилари Ослодаги меҳмонхона олдида автобусдан тушаётган пайтда эшик кескин очилиб, “Манчестер Сити” ҳужумчисининг юзига теккан. Ҳодисага гувоҳ бўлганлар айтишича, футболчи оғриқдан жаҳли чиқиб, қўпол сўз ишлатган.
Кейинчалик футболчи ижтимоий тармоқдаги саҳифасига жароҳат сабаб шишган лаблари акс этган суратини жойлади. Расм остига “учта чок”, дея изоҳ қолдирган. Бироқ бу пост кўп ўтмай ўчириб ташланган.
Эслатиб ўтамиз, Норвегия терма жамоаси Жаҳон чемпионати саралаши 6-тури доирасида Молдовага қарши баҳс олиб боради. Беллашув 9 сентябрь кунига белгиланган. Айни пайтда жамоа мундиал йўлланмасини қўлга киритишга яқин турибди. Улар I гуруҳида 12 очко билан якка пешқадамлик қилмоқда. Кейинги ўринларда Исроил (9 очко), Италия (6 очко), Эстония (3 очко) ва Молдова (0 очко) терма жамоалари жой олган.













