Yarim himoyachilar Jud Bellingem va Eduardo Kamavinga safga qaytishga yaqin turibdi. Ingliz va fransuz maydonda umumiy guruhda qisman yuklama bilan mashg‘ulot o‘tkazdi, deya xabar bermoqda Madrid Xtra. Ikkala yarim himoyachi ham hozircha jamoaviy o‘yinlarga tayyor emas - ular La Liganing 13 sentyabr, shanba kuni bo‘lib o‘tadigan "Real Sosyedad"ga qarshi navbatdagi o‘yiniga tayyor bo‘lishi dargumon.
Jud Bellingemning yelkasida jarrohlik amaliyoti o‘tkazildi, shu sababli u mavsumoldi tayyorgarligi va joriy mavsumning dastlabki o‘yinlarini o‘tkazib yubordi. Eduardo Kamavinga aprel oyidan beri jarohatlar tufayli safdan chiqqan.
"Real" Ispaniya chempionatida 3 turdan so‘ng 9 ochko jamg‘argan holda peshqadamlik qilmoqda.
