Madridning «Real» klubi va braziliyalik hujumchi Vinisius Junior futbolchining shartnomasini uzaytirish jarayonini yakuniy bosqichga yetkazish uchun rasman uchrashuv belgilashdi. Bu haqda AS nashri xabar bermoqda.

Avvalroq OAVda Vinisiusning klubni tark etishi mumkinligi haqida xabarlar tarqalgan edi. Bunga sabab sifatida uning fransiyalik hujumchi Kilian Mbappe bilan munosabatlari tarang ekanligi ko‘rsatilgandi.

Braziliyalik forvard 2018 yildan buyon «Real» tizimida harakat qilib kelmoqda. Yakunlangan klub mavsumida Vinisius barcha musobaqalarda jami 53 ta o‘yinda maydonga tushib, 22 ta gol urdi va 14 ta golli uzatmani amalga oshirdi.

Transfermarkt ma’lumotlariga ko‘ra, uning transfer qiymati 140 million yevroni tashkil qiladi. Hujumchining madridliklar bilan amaldagi shartnomasi 2027 yilning 30 iyuniga qadar mo‘ljallangan.