Мадриднинг «Реал» клуби ва бразилиялик ҳужумчи Винисиус Жуниор футболчининг шартномасини узайтириш жараёнини якуний босқичга етказиш учун расман учрашув белгилашди. Бу ҳақда AS нашри хабар бермоқда.
Аввалроқ ОАВда Винисиуснинг клубни тарк этиши мумкинлиги ҳақида хабарлар тарқалган эди. Бунга сабаб сифатида унинг франциялик ҳужумчи Килиан Мбаппе билан муносабатлари таранг эканлиги кўрсатилганди.
Бразилиялик форвард 2018 йилдан буён «Реал» тизимида ҳаракат қилиб келмоқда. Якунланган клуб мавсумида Винисиус барча мусобақаларда жами 53 та ўйинда майдонга тушиб, 22 та гол урди ва 14 та голли узатмани амалга оширди.
Transfermarkt маълумотларига кўра, унинг трансфер қиймати 140 миллион еврони ташкил қилади. Ҳужумчининг мадридликлар билан амалдаги шартномаси 2027 йилнинг 30 июнига қадар мўлжалланган.
