Нуфузли инсайдер Фабрицио Романо «Барселона»нинг янги ҳужумчи сотиб олиш борасидаги режалари ҳақида тўхталиб ўтди. Романонинг сўзларига кўра, каталонияликлар Хулиан Альварес трансфери бўйича «Атлетико» билан музокараларни давом эттиришмоқда.

«Ўйлашимча, якунда «Барселона» ҳужумчи сотиб олади. Ҳозир улар Хулиан Альварес билан боғлиқ вазият қандай ҳал бўлишини кутишмоқда, аммо уларнинг мақсади — ҳужумчи харид қилиш.

Альварес ушбу позиция учун асосий приоритетми? Улар уни таркибга қўшиб олишга ҳаракат қилишади, бу аниқ. Битим амалга ошадими-йўқми — бу «Барселона»дан кўра кўпроқ «Атлетико»га боғлиқ. Аммо икки клуб ўртасидаги музокаралар давом этмоқда», — деди Романо Goal порталига берган интервьюсида.

Нуфузли Transfermarkt портали 26 ёшли Хулиан Альвареснинг трансфер қийматини 120 миллион еврога баҳоламоқда.