Madridning “Real” klubi “Bavariya” markaziy himoyachisi Dayo Upamekanoga qiziqish bildirmoqda. Bu haqda jurnalist Kristian Falk xabar berdi.
Manbaga ko‘ra, “qaymoqranglilar” 26 yoshli fransuz futbolchisini kelasi yoz erkin agent sifatida o‘z safiga qo‘shib olishni rejalashtirgan. Upamekanoning “Bavariya” bilan amaldagi shartnomasi 2026 yil 30 iyunda yakunlanadi.
Upamekano 2021 yildan buyon myunxenliklar safida to‘p tepadi. Joriy mavsumda u barcha musobaqalarda 8 ta uchrashuvda maydonga tushib, bir golli uzatma qayd etdi.
Transfermarkt ma’lumotlariga ko‘ra, futbolchining bozor qiymati 50 million yevroni tashkil etadi. U Bundesligada eng qimmatbaho markaziy himoyachilardan biri hisoblanadi.
