"Liverpul" qanot hujumchisi Muhammad Saloh Angliya Premyer-Ligasi 4-turidan o‘rin olgan "Byornli"ga (1:0) qarshi o‘yindan keyin mersisaydliklarning yangi o‘yinchilari haqida fikr bildirdi. Misrlik futbolchi o‘yin qaydnomasida hujumchi Aleksandr Isakning yo‘qligiga ham munosabat bildirdi. Shvesiyalik futbolchi "qizillar" safiga "Nyukasl"dan 125 mln funt (145 mln yevro) evaziga o‘tdi.

"Bizga kuchli raqib qarshilik qildi. Biz kuchimiz boricha chiziqlar orasida o‘ynashga harakat qildik, ammo g‘alaba qozonish qiyin bo‘ldi. Yakunda g‘alaba qozonishga muvaffaq bo‘lganimizdan xursandman.

O‘yinchilar bizning sxemamizga moslashmoqda. Bizda boshlang‘ich tarkibda bir nechta yangi o‘yinchilar bor edi. Ularni jamoamiz o‘yiniga qo‘shish uchun vaqt kerak. Ular o‘yinda o‘zlarini qulay his qilishlari uchun harakat qilamiz. Aleks [Isak] o‘tgan hafta keldi va u jamoaga sekin moslashib oladi. Biz muvozanatni topishga harakat qilyapmiz.

Biz taslim bo‘lmaymiz. Shunchaki borimizni berishga harakat qilyapmiz," - deya Salohning so‘zlarini keltiradi "Liverpul" rasmiy sayti.