"Yuventus" vingeri Fransishku Konseysau A Seriya doirasidagi "Verona"ga (1:1) qarshi o‘yindagi durang haqida fikr bildirdi.

Portugaliyalik futbolchi 19-daqiqada "keksa sinyora"ni hisobda oldinga olib chiqdi, bunga maydon egalari birinchi bo‘lim oxirida penaltini aniq amalga oshirib, javob berdi.

"Bizda kuchli jamoa bor, uchta turnirda ishtirok etamiz. Biz charchadik, bu normal holat. "Verona" bilan safarda oson bo‘lmasligi aniq edi. Bugun to‘pni juda ko‘p yo‘qotdik, ammo buni har uch kunda o‘ynayotganimiz bilan izohlash mumkin," - dedi Konseysau intervyuda.

"Yuventus" A Seriyaning 4-turidan keyin 10 ochko jamg‘ardi. 27 sentyabr, shanba kuni Igor Tudor jamoasi o‘z maydonida "Atalanta"ga qarshi bahs olib boradi.