O‘zbekistonlik super og‘ir vazn toifasida ringga chiqadigan Bahodir Jalolov (15–0, 14 KO) navbatdagi jangini 6 oktyabr kuni Rossiyaning Sankt-Peterburg shahrida bo‘lib o‘tadigan “IBA Pro 10” turnirida o‘tkazadi. Bu haqda tashkilotning Instagram sahifasida xabar qilindi.
Jalolovning raqibi rossiyalik bokschi Vitaliy Kuduxov (7–3, 3 KO) bo‘ladi. Kuduxov avgust oyida rossiyalik boshqa bir bokschi Vartan Arutyunyanga qarshi ringga chiqib, imkoniyatni boy bergan edi.
Bahodir Jalolov esa so‘nggi jangini 2025 yil aprel oyida Ostona shahrida ukrainalik Igor Shevadzuskiyga qarshi o‘tkazgan va hakamlar yakdil qarori bilan g‘alaba qozongan edi. Shuningdek, Jalolov 26 iyul kuni AQSHning Nyu-York shahrida bo‘lib o‘tishi rejalashtirilgan boks oqshomida jang qilishi kerak edi. Biroq uning italiyalik raqibi Janmarko Kardilo sog‘lig‘i bilan bog‘liq muammolar tufayli jangda ishtirok eta olmasligi ma’lum qilgandi.
Ma’lumot uchun, Bahodir Jalolov shu kunga qadar professional boksda 15 marta jang o‘tkazib, ularning 14 tasida muddatidan avval g‘alaba qozongan bo‘lsa, bir bahsda ochkolar hisobiga raqibdan ustun kelgan.













