«Atletiko» klubi stadion hududidagi Tibo Kurtua nomi yozilgan tablichkani olib tashlashi mumkin.
Bugun «Real»ga qarshi La Liganing 7-turidan o‘rin olgan derbi (5:2) oldidan «matraschilar» muxlislari yana bir bor belgiyalik darvozabon nomi yozilgan tablichkani chiqindilar bilan to‘ldirishdi.
The Athletic nashri jurnalisti Gilyermo Rai ma’lumotiga ko‘ra, «Atletiko»da klubning sobiq o‘yinchilari nomlari tushirilgan tablichkalar «afsonalar alleyasi»ga joylashtirilish tizimini o‘zgartirish masalasi jiddiy ko‘rib chiqilmoqda. Bunda tegishli qarorlar muxlislar ovoz berish natijalariga ko‘ra qabul qilinishi mumkin.
Kurtua nomi yozilgan tablichka abadiy olib tashlanishi ehtimoli bor.
Tibo «Atletiko» safida 2011 yildan 2014 yilgacha to‘p surgan. 2018 yildan esa «Real»da o‘ynab kelmoqda.













