"Manchester Siti" bosh murabbiyi Xosep Gvardiola jamoa hujumchisi Jeremi Dokuning joriy mavsumdagi o‘yini haqida fikr bildirdi.

Premyer-liganing 6-turidan o‘rin olgan o‘yinda "shaharliklar" o‘z maydonida "Byornli"ni 5:1 hisobida mag‘lubiyatga uchratdi. Doku 1 ta golli pas berdi.

"Menda shunday hissiyot borki, Doku maydonning so‘nggi uchdan bir qismida vazminroq qarorlar qabul qila boshladi! U chuqur himoyada o‘ynaydigan jamoalar uchun aql bovar qilmaydigan xavf tug‘diradi. Jeremi haqiqatan ham biz uchun juda muhim, juda muhim!," - dedi Gvardiola jurnalistlarga.

Joriy mavsumda 23 yoshli belgiyalik barcha musobaqalarda yettita uchrashuvda qatnashib, gol urdi va uchta assist muallifiga aylandi.