2026-yilgi Jahon chempionati rasmiy to‘pi namoyish etildi.

«Trionda» — «Adidas» kompaniyasi tomonidan ishlab chiqarilgan.

«Trionda» nomi ispan tilidan tarjima qilinganda «uch to‘lqin» degan ma’noni anglatadi. Bu nom birinchi bor uch davlat – Kanada, Meksika va AQSH – birgalikda musobaqani mezbonlik qilayotganini ramziy tarzda namoyish etadi. To‘pning dizayni va innovasion texnologiyalari musobaqaning tarixiy ahamiyatini o‘zida mujassam etgan.

FIFA prezidenti Janni Infantino quyidagicha izoh berdi:

«FIFA Jahon Chempionati-2026 uchun rasmiy to‘p – bu chinakam san’at asari! Men «Trionda» to‘pini taqdim etishdan xursandman va faxrlanaman. «Adidas» yana bir bor ramziy va texnologik jihatdan mukammal to‘pni yaratdi – bu dizayn uch mezbon mamlakat – Kanada, Meksika va AQSHning birdamligini, ishtiyoqini o‘z ichiga oladi.

Bu go‘zal to‘pning darvozani to‘riga borib tushishini intiqlik bilan kutyapman. Futbol bayrami tobora yaqinlashmoqda – va to‘p endi harakatda!»

«Trionda» to‘pining o‘ziga xos xususiyatlari:

— Ranglar uyg‘unligi: — Kanada (qizil), Meksika (yashil) va AQSH (ko‘k) ranglaridan ilhomlangan.

— To‘lqinli geometrik dizayn: — Yangi to‘rt paneldan iborat shakl, to‘lqin effektlarini aks ettiruvchi chuqur choklar orqali havo harakatida mukammal barqarorlikni ta’minlaydi.

— FIFA Jahon chempionati kubogiga ishora sifatida oltin bezaklar ishlatilgan.

Yangi avlod texnologiyalari:

— Yopishqoqlikni oshiruvchi yuzaki ikonlar, ayniqsa nam havoda o‘yin uchun qulaylikni ta’minlaydi.

— Unga 500 gers chastotadagi harakat datchigi o‘rnatilgan. Bu texnologiya to‘pning harakatini aniq qayd etib, VAR tizimiga real vaqt rejimida ma’lumot yuboradi, ayniqsa noaniq vaziyatlar, jumladan ofsayd holatlarini aniqlashda yordam beradi.