“Barselona” sport direktori Deku klub hujumchisi Lamin Yamal bilan bog‘liq vaziyat tufayli Ispaniya terma jamoasi va klub o‘rtasidagi tortishuv haqida fikr bildirdi.

Sentyabr oyidagi terma jamoalar o‘yinlaridan so‘ng “Barselona” bosh murabbiyi Hans-Diter Flik “Qizil furiya” futbolchilarni ehtiyot qilmasligini aytgan edi. Nemis mutaxassisi Yamalda noqulaylik bo‘lishiga qaramasdan uni terma jamoa o‘yinlariga jalb etilganidan norozi bo‘lgan. Keyinroq Ispaniya terma jamoasi bosh murabbiyi Luis de la Fuente Flikning so‘zlaridan ajablanganini bildirgan.

"Lamin sonining past qismida noqulaylik his qilgan va “PSJ”ga qarshi o‘yin uchun tiklanishga harakat qilgan, o‘zining eng yaxshi darajasida o‘ynashni xohlagan. Biroq 90 daqiqa davomidagi yuqori shiddatni hisobga olsak, hammasi rejaga ko‘ra ketmadi.

O‘yindan so‘ng Laminga maxsus tayyorgarlik kerakligi uchun u “Sevilya”ga qarshi o‘yinda ishtirok etmasligi to‘g‘risida qaror qabul qilindi. Tibbiy hisobot Ispaniya futbol federasiyasiga yuborildi. Lamin de la Fuente bilan gaplashganmi-yo‘qmi, bilmayman. U (de la Fuente) bunday huquqqa ega, ilgari u Gavi bilan ham muloqot qilgan edi. Laminda hamon noqulaylik bor edi, u o‘zini yaxshi his qilmagan. Biz bu holatni klub ichida muhokama qildik va terma jamoaga ma’lum qildik.

Men terma jamoa ichida emasman, shuning uchun u yerda futbolchilar sog‘ligiga qay darajada e’tibor berilishini aniq bilmayman. Ammo biz ular futbolchilarga yaxshi munosabatda bo‘lishini bilamiz. Bunday vaziyat hammaga ham yoqmasligi mumkin", — dedi Deku Catalunya Ràdio’ga bergan intervyusida.