“Барселона” спорт директори Деку клуб ҳужумчиси Ламин Ямал билан боғлиқ вазият туфайли Испания терма жамоаси ва клуб ўртасидаги тортишув ҳақида фикр билдирди.

Сентябрь ойидаги терма жамоалар ўйинларидан сўнг “Барселона” бош мураббийи Ҳанс-Дитер Флик “Қизил фурия” футболчиларни эҳтиёт қилмаслигини айтган эди. Немис мутахассиси Ямалда ноқулайлик бўлишига қарамасдан уни терма жамоа ўйинларига жалб этилганидан норози бўлган. Кейинроқ Испания терма жамоаси бош мураббийи Луис де ла Фуэнте Фликнинг сўзларидан ажабланганини билдирган.

"Ламин сонининг паст қисмида ноқулайлик ҳис қилган ва “ПСЖ”га қарши ўйин учун тикланишга ҳаракат қилган, ўзининг энг яхши даражасида ўйнашни хоҳлаган. Бироқ 90 дақиқа давомидаги юқори шиддатни ҳисобга олсак, ҳаммаси режага кўра кетмади.

Ўйиндан сўнг Ламинга махсус тайёргарлик кераклиги учун у “Севилья”га қарши ўйинда иштирок этмаслиги тўғрисида қарор қабул қилинди. Тиббий ҳисобот Испания футбол федерациясига юборилди. Ламин де ла Фуэнте билан гаплашганми-йўқми, билмайман. У (де ла Фуэнте) бундай ҳуқуққа эга, илгари у Гави билан ҳам мулоқот қилган эди. Ламинда ҳамон ноқулайлик бор эди, у ўзини яхши ҳис қилмаган. Биз бу ҳолатни клуб ичида муҳокама қилдик ва терма жамоага маълум қилдик.

Мен терма жамоа ичида эмасман, шунинг учун у ерда футболчилар соғлигига қай даражада эътибор берилишини аниқ билмайман. Аммо биз улар футболчиларга яхши муносабатда бўлишини биламиз. Бундай вазият ҳаммага ҳам ёқмаслиги мумкин", — деди Деку Catalunya Ràdio’га берган интервьюсида.