Kolumbiya terma jamoasi Chilida bo‘lib o‘tayotgan futbol bo‘yicha yoshlar o‘rtasidagi jahon chempionatining chorak finalida Ispaniya terma jamoasini mag‘lub etdi.
Talkadagi uchrashuv 3:2 hisobida kolumbiyaliklar foydasiga hal bo‘ldi. G‘oliblar safida Neyser Vilyarreal (38, 64 va 89-daqiqalar) xet-trik qayd etdi. Ispaniyaliklardan Rayan Belid (56) va Jan Virjili (59) o‘z nomini tabloga yozdirib qo‘ydi.
Kolumbiya terma jamoasi tarixda ikkinchi marta va 2003 yildan beri birinchi marta yoshlar o‘rtasidagi jahon chempionatining yarim finaliga chiqdi. Ispanlar uch marta turnirning yarim finaliga chiqishgan va 1999 yilda jahon chempioni bo‘lishgan.
Kolumbiyaliklar yarim finalda Meksika va Argentina terma jamoalari o‘rtasidagi o‘yin g‘olibi bilan to‘qnash keladi.
