Ispaniyaning ESPN nashri 2026-yilgi Jahon chempionatida ishtirok etadigan hamda qatnashish ehtimoli yuqori bo‘lgan eng kuchli terma jamoalar imkoniyatini baholadi. Reytingdan 87 ta terma jamoa o‘rin oldi. Ularning ayrimlari turnirga yo‘llanmani allaqachon qo‘lga kiritgan, boshqalari esa hali saralash bosqichida ishtirok etmoqda.

Baholashda asosiy mezon sifatida jamoalarning so‘nggi natijalari va tarkiblardagi futbolchilarning umumiy qiymati inobatga olingan.

Reytingda Didye Desham boshchiligidagi Fransiya terma jamoasi birinchi o‘rinni egalladi. 2026-yilgi Jahon chempionatida “uchranglilar” hujum chizig‘ida Kilian Mbappe, Maykl Olise va Usmon Dembele harakat qilishi kutilmoqda. Fransiyaning zaxira hujumchilari sifatida “Liverpul”, “PSJ”, “Inter” va “Manchester Siti” kabi grand klublarda to‘p surayotgan futbolchilar tanlanadi. Markaziy himoya chizig‘ida esa “Arsenal”, “Bavariya” yoki “Liverpul” futbolchilari hatto zaxira o‘rindig‘ida qolishi mumkin. Shu bois mutaxassislar Fransiya JCH-2026 musobaqasining asosiy favoriti hisoblanadi.

Ikkinchi pog‘onadan Ispaniya terma jamoasi joy oldi. Kuchli uchlikni Yevropa qit’asidan birinchilardan bo‘lib Jahon chemionatiga yo‘llanma olgan Angliya terma jamoasi yakunlagan.

Italiyalik mutaxassis Fabio Kannavaro boshchiligidagi O‘zbekiston terma jamoasi 53-pog‘onadan joy oldi. Umuman olganda, Osiyo qit’asida o‘ynaydigan terma jamoalar orasida eng yuqori o‘rinni Yaponiya egalladi. “Samuraylar” ESPN nashri tomonidan tuzilgan ro‘yxatning 25-pog‘onasida qayd etilgan. Janubiy Koreya (42), Avstraliya (45), Eron (48), O‘zbekiston (53), BAA (60), Iordaniya (61), Saudiya Arabistoni (62) va Qatar (73) ham ushbu 87 talik reytingdan joy olgan.

Dastlabki 20 ta o‘rinni quyidagi jamoa egalladi:

1. Fransiya
2. Ispaniya
3. Angliya
4. Portugaliya
5. Braziliya
6. Niderlandiya
7. Argentina
8. Italiya
9. Germaniya
10. Urugvay
11. Daniya
12. Norvegiya
13. Belgiya
14. Turkiya
15. Shvesiya
16. Kolumbiya
17. Marokash
18. Xorvatiya
19. Shveysariya
20. Ukraina
-----
53. O‘zbekiston