21 oktyabr kun "Nasaf" klubi OFK Elit chempionlar ligasi musobaqasining 3-turi doirasida Birlashgan Arab Amirliklarining "Shabab Al-Ahli" jamoasi bilan kuch sinashadi.
Keling, ushbu jamoa haqida biroz to‘xtalamiz.
"Shabab Al-Ahli" jamoasi 8 yillik tarixga ega. Klub 2017 yili Birlashgan Arab Amirliklari futbolidagi eng nomdor klublar - "Al-SHabab" va "Al-Ahli", shuningdek, "Dubay SK" klublarining birlashtirilishidan tashkil topgan.
Jamoaga muxlislar tomonidan "The Red Knights" (qizil riserlar) degan nom berilgan.
"Shabab Al-Ahli" o‘z uy uchrashuvlarini Dubay shahridagi "Rashid" stadionida o‘tkazadi. Ushbu maydon o‘z bag‘riga 8 mingdan ziyod muxlisni sig‘dira oladi.
Jamoa Birlashgan Arab Amirliklari chempionatining 2 karra g‘olibi, 3 karra Prezident kubogi sohibi va yana 3 karra mamlakat Superkubogi egasi hisoblanadi.
"Shabab Al-Ahli" shu vaqtga qadar Osiyo Futbol Konfederasiyasi tomonidan o‘tkaziladigan rasmiy musobaqalarda 35 ta o‘yin o‘tkazgan. 13 ta o‘yinda g‘alaba qozongan, 7 ta o‘yin dubayliklarning mag‘lubiyati bilan yakunlangan. 11 ta bahsda esa durang natija qayd etilgan.
Jamoani ayni paytda 55 yoshli portugaliyalik mutaxassis Paulo Sousa boshqarmoqda. Ushbu mutaxassis o‘z vaqtida KPR, "Suonsi Siti", "Lester Siti" kabi APL klublarida, shuningdek, "Salernitana" va "Fiorentina" kabi A Seriya klublarida faoliyat olib borgan.
Uning boshqaruvida Isroilning "Makkabi Tel-Aviv" jamoasi va Shveysariyaning "Bazel" klublari o‘z mamlakatlari Oliy ligasida chempionlikga qo‘lga kiritgan. Birlashgan Arab Amirliklari chempionatida o‘tgan mavsum "Shabab Al-Ahli" klubi aynan Sousa qo‘l ostida chempionlikka erishgan.
Jamoa tarkibida ayni vaqt "Valensiya" sobiq futbolchisi Federiko Kartabiya, "Sevilya" jamoasi hujumchisi Munas Dabbur, "Roma" jamoasi sobiq a’zosi Sardor Azmun va Eron terma jamoasining asosiy futbolchilaridan biri Said Izzatullohi kabi Yevropa va Osiyo futbolida nom qozongan futbolchilar to‘p surmoqda.
Ushbu klub O‘zbekiston milliy terma jamoasi futbolchilari uchun ham begona emas. Yaqin yillar mobaynida "Shabab Al-Ahli" safida Odil Hamrobekov, Jaloliddin Masharipov, Aziz G‘aniyev kabi O‘zbekiston terma jamoasi futbolchilari faoliyat olib bordilar.
Eslatib o‘tamiz, OFK Elit chempionlar ligasi 3-turidan o‘rin olgan "Shabab Al-Ahli" — "Nasaf" o‘yini 21 oktyabr kuni bo‘lib o‘tadi. O‘yin Toshkent vaqti bilan 21:00 da start olishi ko‘zda tutilgan.
